Benvid@. Non somos unha gran axencia de comunicación. Aquí non atoparás aos creadores do último anuncio de moda. Nin sequera podemos gabarnos de ter feito series; non, non temos experiencia en ficción.

O que atoparás en nós é unha pequena produtora galega creada por David Miranda, operador de cámara que alá por setembro de 1998, no seu primeiro día na Escola de Imaxe e Son da Coruña -mentres que a maioría dos recén chegados afirmaban querer traballar no cine- sorprendeu a todos dicindo: "Eu quero ser cámara de televisión!"

Dito e feito. Primeiro capítulo: Antena 3. Case catro anos de aprendizaxe nunha cadea nacional con informativo diario territorial. Gravar "montado" na cámara, edición lineal cos seus problemas de drops naquelas cintas, facer de cámara de plató recén chegado -coa lingua fóra- dunha cobertura...

Segundo capítulo: unha pequena produtora que naquel momento prestaba servizo a Canal+ e televisións autonómicas. Alí aprendemos a traballar en condicións precarias e sen o luxo das grandes empresas, pero sí coas súas esixencias e facendo de todo.

Terceiro capítulo: a vida dun freelance cunha única cámara que comeza de cero. E autónomo, para rematalo. Non creo que sexa necesario dicir que os inicios non foron doados. Disto hai case 10 anos.

E aquí estamos, resumindo 20 anos de experiencia en poucos parágrafos para que aqueles que non nos coñezan queiran facelo e os que nos acompañaron neste camiño queiran seguir facéndoo moito tempo. Dende esas cintas con drops ata a estación de edición non lineal, as realizacións multicámara, os directos con mochila 4G propia, as gravacións con cámaras 4K ... e ata facer o noso propio sitio web!

Que nos depara o futuro? Non podemos sabelo, pero hai unha cousa que podemos asegurar: seguiremos poñendo o mellor de nós en calquera traballo por sinxelo que sexa. Non queremos abarcar moito, preferimos centrar os nosos esforzos en facer ben as cousas que decidimos facer. Non nos tremen as mans no directo e cando temos que estar "finos" para gravar un documental dunha hora, sabemos como baixar as pulsacións.